Një tërmet me magnitudë 6.7 ka goditur Perunë qendrore mbrëmjen e së premtes, duke shkaktuar të paktën 15 të plagosur dhe dëme në dhjetëra banesa. Lëkundjet e forta kanë shkaktuar panik te banorët, ndërsa në kryeqytetin Lima qytetarët kanë dalë të alarmuar në rrugë.
Sipas Institutit Kombëtar të Mbrojtjes Civile të Perusë (INDECI), 11 persona janë plagosur në rajonin e Junín, ndërsa katër të tjerë në Huánuco, Lima, Callao dhe Pasco.
Tërmeti u regjistrua më 20 nëntor, në orën 19:09 sipas kohës lokale, me epiqendër rreth 30 kilometra në veriperëndim të qytetit Junín dhe në një thellësi prej 129 kilometrash, sipas Institutit Gjeofizik Peruan (IGP).
Nga të dhënat paraprake të autoriteteve, 127 banesa janë prekur nga lëkundjet, ndërsa katër prej tyre janë shpallur të pabanueshme. Dëmet më të mëdha janë raportuar në rajonet Junín dhe Pasco.
Panik është shkaktuar edhe në kryeqytetin Lima, ku banorët kanë dalë në rrugë dhe disa ndërtesa janë evakuuar si masë paraprake, nga frika e pasgoditjeve.
Lëkundjet janë ndjerë gjithashtu në disa zona të Kolumbisë, përfshirë kryeqytetin Bogota, ku janë aktivizuar alarmet në ndërtesa dhe qytetarët janë larguar prej tyre.
Ndërkohë, IGP ka raportuar edhe dy lëkundje të tjera në rajonin Junín, me magnitudë 5.0 dhe 3.5. Autoritetet amerikane të monitorimit të cunamit kanë bërë të ditur se tërmeti nuk paraqet rrezik për cunam.
