Një aksident tragjik ka ndodhur në rrugën Prishtinë–Podujevë, në fshatin Penuh, ku një person me aftësi të kufizuara, i cili po lëvizte me karrocë, ka humbur jetën pasi është goditur nga një veturë.
Siç raporton Sinjali, viktima ka ndërruar jetë në vendin e ngjarjes si pasojë e goditjes.
Në vendin e aksidentit kanë dalë ekipet e Policisë dhe të emergjencës mjekësore. Në pamjet e publikuara nga Sinjali shihen disa automjete policore me drita sinjalizuese, një ambulancë dhe zyrtarë policorë që qëndrojnë pranë vendit ku ka ndodhur aksidenti.
Ende nuk dihen rrethanat e sakta në të cilat ka ndodhur aksidenti, ndërsa nuk janë bërë të ditura as të dhënat për identitetin dhe moshën e viktimës.
Priten informacione të tjera nga autoritetet lidhur me shkaqet dhe rrethanat e aksidentit.
