Muaji mars pritet të sjellë një mot tipik pranveror, por me ndryshime të forta, sipas meteorologut Akil Osmani, i cili parashikon temperatura më të larta se zakonisht dhe alternime të shpeshta gjatë javëve në vazhdim.
Sipas tij, ndryshe nga vitet e tjera, këtë vit marsi do të karakterizohet nga temperatura të larta për stinën, ku termometri në disa zona pritet të shkojë deri në 22 gradë Celsius. Ditët e para të muajit do të dominohen nga mot i qëndrueshëm dhe intervale të gjata me diell, duke sjellë një ndjesi të hershme pranvere.
Meteorologu shpjegon se gjatë 15 ditëve të para të marsit pritet kryesisht mot i kthjellët, megjithëse nuk do të mungojnë edhe vranësirat apo reshje të lehta shiu në zona të caktuara. Temperaturat do të jenë më të larta si në mesditë ashtu edhe në orët e mëngjesit, duke shënuar një rritje graduale krahasuar me normat tipike të stinës.
Dita e premte dhe fundjava, sipas parashikimeve, do të sjellin stabilitet më të madh atmosferik dhe më shumë diell, ndërsa pjesa e parë e muajit do të mbetet kryesisht e qetë.
Megjithatë, ndryshimi më i madh pritet pas mesit të marsit. Sipas meteorologut, pjesa e dytë e muajit mund të sjellë kthesë të motit me reshje shiu dhe luhatje më të forta temperaturash, duke sinjalizuar një periudhë më dinamike atmosferike.
Ekspertët këshillojnë qytetarët të shfrytëzojnë ditët e para të ngrohta, por gjithashtu të jenë të përgatitur për ndryshime të papritura, pasi marsi njihet tradicionalisht si muaj me mot të paqëndrueshëm.
