Deputetë të Partia Demokratike janë paraqitur mbrëmjen e sotme në Komisariatin e Policisë Nr. 1 në Tiranë, aty ku janë shoqëruar disa protestues pas tubimit të zhvilluar më herët.
Mes deputetëve që kanë shkuar në komisariat ishin edhe Gazment Bardhi dhe Flamur Noka, të cilët janë përfshirë në përplasje verbale dhe fizike me efektivët e policisë.
Sipas deputetëve, drejtuesit e komisariatit u kanë ndaluar hyrjen në ambientet e brendshme të institucionit dhe nuk u kanë dhënë informacion mbi gjendjen dhe statusin ligjor të protestuesve të shoqëruar, duke shkelur, sipas tyre, të drejtat dhe funksionin e përfaqësuesve të zgjedhur të Kuvendit.
Pamjet e filmuara nga vendngjarja tregojnë momente tensioni në korridorin hyrës të komisariatit, ku disa efektivë policie janë rreshtuar për të bllokuar hyrjen, ndërsa deputetët kanë tentuar të futen brenda. Situata ka degraduar në shtyrje dhe përplasje fizike, duke e bërë klimën edhe më të rënduar.
Në ambientet e komisariatit kanë qenë të pranishëm edhe familjarë të personave të shoqëruar, të cilët kanë kërkuar me ngulm informacion dhe kanë shprehur shqetësim për të afërmit e tyre. Reagimet e tyre kanë shtuar tensionin, duke nxitur debate dhe përplasje të tjera verbale me forcat e rendit.
Ngjarja ka rikthyer në vëmendje përplasjet e përsëritura mes opozitës dhe policisë gjatë protestave, ndërsa deri më tani nuk ka një reagim zyrtar të detajuar nga Policia e Shtetit lidhur me incidentin dhe arsyet e kufizimit të hyrjes së deputetëve në komisariat.
