Nuk ka qetësi për sulmuesin iranian Mehdi Taremi. Sipas një raportimi të publikuar nga Tuttosport, futbollisti ka kërkuar nga klubi i tij aktual, Olympiacos, që ta lejojë të largohet për në Iran, në mes të konfliktit të hapur që vendi i tij po përjeton me SHBA-në dhe Izraelin.
Sipas gazetës italiane, Taremi thuhet se ka shprehur dëshirën për të mos qëndruar pasiv në këtë situatë, duke cituar fjalët: “Vendi im ka nevojë për mua”. Madje, TuttoSport ka zgjedhur një titull të fortë në faqen e parë: “Po shkoj në luftë”.
Kujtojmë se edhe verën e kaluar, sulmuesi kishte mbetur i bllokuar në Iran për shkak të tensioneve në rajon, duke humbur disa angazhime me ish-klubin e tij, Inter.
Megjithatë, deri në këto momente nuk ka asnjë konfirmim zyrtar nga lojtari apo nga klubi grek lidhur me raportimet. Nëse lajmi rezulton i vërtetë, nuk do të ishte hera e parë që sportistë profesionistë i bashkohen vendit të tyre në kohë lufte, siç ndodhi me disa atletë ukrainas gjatë konfliktit me Rusinë.
Situata mbetet e paqartë dhe priten reagime zyrtare në vijim.
