Një aksident i rëndë rrugor ka ndodhur në Itali, ku kanë humbur jetën dy të rinj shqiptarë nga Mitrovica, duke tronditur familjarët dhe gjithë komunitetin.
Viktimat janë identifikuar si Fidan Peci, 27 vjeç, dhe Ardian Avdyli, 21 vjeç. Sipas informacioneve të para, dy të rinjtë kanë ndërruar jetë si pasojë e plagëve të marra në aksidentin e rëndë, ndërsa rrethanat e plota të ngjarjes janë ende nën hetim nga autoritetet italiane.
Lajmi i hidhur është konfirmuar edhe nga kryetari i Komunës së Mitrovicës, Faton Peci, i cili përmes një reagimi publik ka shprehur ngushëllime për familjet e viktimave. Ai theksoi se humbja e jetëve të reja është një dhimbje e madhe jo vetëm për familjarët, por për gjithë qytetin dhe Kosovën.
Në mesazhin e tij, kryetari i komunës u shpreh se qyteti i Mitrovicës është pranë familjeve në këto momente të vështira, duke ndarë dhimbjen për humbjen tragjike të dy të rinjve.
Ngjarja ka shkaktuar reagime të shumta dhe trishtim të madh në rrjetet sociale, ndërsa miq dhe të afërm kanë nisur mesazhe ngushëllimi për familjet e të ndjerëve.
Autoritetet vijojnë hetimet për të sqaruar shkakun e aksidentit që mori dy jetë të reja shqiptare në Itali.
