Rasti i zhdukjes së vogëlushes Bleona Mata vijon të mbetet një nga historitë më të rënda dhe më të dhimbshme në Shqipëri, ndërsa zhvillimet e fundit kanë rikthyer sërish vëmendjen publike mbi këtë ngjarje që prej vitesh mbetet pa përgjigje.
Së fundmi, dëshmi të reja kanë hapur një pistë tjetër kërkimesh, duke ngritur dyshime serioze se Bleona mund të jetë rrëmbyer dhe të jetë mbajtur peng për rreth tre muaj në zonën e Llakatundit, në Vlorë. Këto pretendime u bënë publike pak ditë më parë në emisionin investigativ Pa Gjurmë në Report TV.
Pista e re është forcuar nga deklarime, dëshmi dhe materiale të reja, të cilat u trajtuan ekskluzivisht në emisionin “Pa Gjurmë”, nën drejtimin e gazetares Odeta Dume. Sipas këtyre informacioneve, rrethanat e zhdukjes së Bleonës mund të kenë qenë shumë më të ndërlikuara sesa është menduar më parë.
E ftuar në studio, nëna e Bleonës, Bukurie Veizi, u përball drejtpërdrejt me dëshmitë dhe faktet e reja që lidhen me fatin e vajzës së saj. Gjatë rrëfimit të saj, ajo deklaroi se familja që tashmë ndodhet në qendër të dyshimeve ka pasur konflikte të mëparshme me familjen Mata, element që, sipas saj, përforcon dyshimet për një rrëmbim të qëllimshëm.
Deklaratat e reja kanë rihapur debatet mbi mënyrën se si është hetuar rasti ndër vite dhe kanë nxitur thirrje për rifillimin e një hetimi të thelluar, me fokus në pistën e Llakatundit dhe në personat e përmendur në dëshmitë e fundit.
Ndërsa familja e Bleonës vazhdon të kërkojë drejtësi dhe të vërtetën, rasti mbetet një plagë e hapur për opinionin publik shqiptar, duke rikujtuar edhe një herë se zhdukja e vogëlushes Bleona Mata është ende një mister që pret zbardhje.
